14.08.2014
Dise que a actual é unha xeración perdida e hai quen fai chistes á súa conta e lles chama a xeración dos “nin-nin” por aquilo de que nin estudian, nin traballan. Supoño que esa será unha moi pequena minoría que poda vivir á conta dos seus maiores, algo que non durará sempre e que rematará por incluílos no grupo de desesperados, aqueles da outra serie de “nin”, que nin poden independizarse, nin poden fundar un fogar e formar unha familia, nin encontrar un traballo digno, nin albiscar un futuro aceptable e xa nin confían en nada nin en nadie, nin conservan a esperanza de se poder realizar como persoas; ou nese outro grupo de “nin”, que nin poden manter á súa familia, nin poden pagar a hipoteca, nin teñen quen lles dea traballo. Se isto non se amaña axiña, coido que non será só unha a xeración perdida, o que nos levará a unha situación xeral de pobreza, como resultado desta despiadada guerra económica na que nos teñen mergullados. Oxalá que non sexa así.
Publicado no Diario de Ferrol | 12.08.2014.
[*] Amadeo Varela Rodríguez -Ferrol 1936, foi traballador de BAZAN, é o autor de "Recordos do vello Racing" publicado no 2000, "Bazan e Ferrol - Unha simbioses perfecta?" (a historia dunha época, "... detrás de cada barco que nace, hai moitas horas de esforzo. Nesa tarefa, miles de traballadores foron gastando a súa saúde e a súa vida") publicado no 2003 e coautor de "Retallos da Memoria II" ("Memorias de neno" sobre a súa vida de pequeno nunha familia republicana perseguida), publicado no 2009. Autor de numerosas cartas e artigos na prensa local. Autor de sitios na rede sobre Ferrol. Cofundador da Asociación San Fernando para defender o Patrimonio Histórico do barrio ferrolán de Recimil contra a súa pretendida demolición, membro do Colectivo Recimil co que promoveu a Plataforma Ártabra 21 e a Plataforma en Defensa dos Espazos Públicos. Na actualidade forma parte do Colectivo Ártabra 21.
__________________